एजेन्सी, २ माघ । क्यानडाका प्रधानमन्त्री मार्क कार्नी र चिनियाँ राष्ट्रपति सी जिनपिङबिच बेइजिङमा ऐतिहासिक भेटवार्ता भएको छ ।
विगत एक दशकदेखि चिसिएको द्विपक्षीय सम्बन्धलाई पुनर्जीवित गर्दै दुवै देश व्यापारिक सम्झौताको खोजीमा जुटेका हुन् ।
सन् २०१८ मा हुवावेका शीर्ष अधिकारीलाई भ्यानकुभरमा पक्राउ गरेपछि ओटावा र बेइजिङबिचको सम्बन्ध निकै खराब भएको थियो । त्यसयता कुनै पनि क्यानेडियन प्रधानमन्त्रीले चीनको भ्रमण गरेका थिएनन्। अधिकारीहरूले यस भ्रमणलाई ‘परिणाममुखी र ऐतिहासिक’ कदमका रूपमा व्याख्या गरेका छन् ।
बुधबार साँझ चीन आइपुगेका प्रधानमन्त्री कार्नीले बिहीबार चिनियाँ प्रिमियर ली कियाङसँग भेट गरेपछि राष्ट्रपति सीसँग औपचारिक वार्ता गरेका हुन् । बैठकको सुरुवातमै कार्नीले कृषि, ऊर्जा र वित्त जस्ता क्षेत्रमा दुवै पक्षले मिलेर काम गर्नुपर्नेमा जोड दिए ।
यी क्षेत्रमा तत्काल प्रगति गर्न सकिने सम्भावना रहेको औँल्याउँदै उनले दुई देशबिचको पुरानो सम्बन्धलाई अझ सुदृढ बनाएर नयाँ उचाइमा पुर्याउने प्रतिबद्धता व्यक्त गरे । कार्नीका अनुसार यो सहकार्यले दुवै देशका जनताका लागि स्थिरता, सुरक्षा र समृद्धि सुनिश्चित गर्नेछ ।
