माघ १२ पछिको यात्रा फरक भूमिका र जिम्मेवारीको हुन सक्छ: प्रकाश सपुत

काठमाडौँ, २ माघ । गायक, संगीतकार तथा अभिनेता प्रकाश सपुतले माघ १२ देखि २१ गतेसम्म आफ्नो जीवनमा फरक भूमिका र जिम्मेवारीको यात्रा हुने सक्ने बताएका छन् ।

बिहीबार सामाजिक सञ्जालमार्फत यस वर्षको सांगीतिक ‘मेला यात्रा–२०८२’ को कार्यतालिका सार्वजनिक गर्दै उनले यस्तो धारणा व्यक्त गरेका हुन् ।

उनले लेखेका छन्, “सम्भवत, यो वर्षका लागी यतिनै । यो मेला यात्रामा आफ्नो पेशा प्रति ईमान्दार र व्यवसायिक मार्यादामा रहेर एउटा कलाकारका रुपमा प्रिय दर्शकहरु संग विशुद्ध सांगितिक मनोरन्जनात्मक भेटघाट हुनेछ । बरु त्यसपछि आउने समय ( १२ देखि २१ ) को यात्रा फरक भुमिका र जिम्मेवारीको यात्रा हुन सक्छ । अवसर, माया र शुभेच्छा दिने सबै सबै प्रति हार्दिक धन्यवाद ।तपाईलाई पाएक पर्ने नजिकको मेलाहरुमा भेटम है ।“