काठमाडौँ, १ माघ । माघे संक्रान्तिको बिदाको अवसर पारेर आजबाट तीनवटा नेपाली चलचित्र प्रदर्शनमा आएका छन् । ‘भाईरल गोर्खे’, ‘मिरमिरे’ र ‘गोबर गणेश’ आजबाट प्रदर्शनमा आएका हुन् ।
चलचित्र ‘भाईरल गोर्खे’लाई निगम श्रेष्ठले निर्देशन गरेका छन् । यो चलचित्रमा सौगात मल्ल, सृष्टि श्रेष्ठ, बुद्धि तामाङ, लक्ष्मी गिरी, राजाराम पौडेल, ऋषि धमला, रवि भुजेल र मिस पवीको मुख्य भूमिका छ ।
‘मिरमिरे’मा यम शेर्पाको लेखन तथा निर्देशन रहेको छ । यो चलचित्रमा दयाहाङ राई, प्रकाश सपूत, सिर्जना निङलेखु, माओत्से गुरुङ, छुल्ठिम गुरुङ, भोलाराज सापकोटालगायतको अभिनय छ ।
‘गोबर गणेश’लाई हाँस्यकलाकार मरिचमान श्रेष्ठ ‘बल्छी धुर्वे’ले निर्देशन गरेका छन् । चलचित्रको कथा पनि निर्देशक स्वयंले लेखेका छन् ।
यो चलचित्रमा बल्छीसँगै, वर्षा शिवाकोटी, विनोद न्यौपाने, पदम तामाङ, निर्मल शर्मा, लक्ष्मीनाथ तिमलसेना, सन्तोष बानिया, माओत्से गुरुङ, सीतादेवी तिमल्सिना, पुजन घिमिरे (पुकु), बुद्धि तामाङलगायतको अभिनय छ ।
‘मिरमिरे’ र ‘भाईरल गोर्खे’ रिलिज हुँदा सौगात मल्ल र दयाहाङ राईबीच प्रतिस्पर्धा हुनेछ । बक्सअफिसमा यी दुई कलाकारबीच को सफल हुनेछन् अबको केही दिनमा आउने बक्सअफिस तथ्यांकले देखाउनेछ ।
