काठमाडौँ, १६ पौष । नेपाल उद्योग वाणिज्य महासङ्घका अध्यक्ष चन्द्र प्रसाद ढकालले मुलुकमा निजी क्षेत्रका लागि लगानी र व्यवसाय गर्ने वातावरण बन्न नसकेको बताएका छन् ।
आज महासङ्घले आयोजना गरेको ‘सामूहिक पहल’ कार्यक्रममा बोल्दै अध्यक्ष ढकालले सरकारले लगानी र रोजगारीका अवसर सिर्जना गर्ने दाबी गरे पनि त्यसको कार्यान्वयन पक्ष अत्यन्तै कमजोर रहेको बताए ।
अध्यक्ष ढकालले सरकारी नीति र दस्ताबेजहरूमा लगानीको वातावरण र रोजगारीका अवसरहरूको ठुला कुरा गरिए पनि व्यवहारमा ती केवल कागजमा मात्रै सीमित भएको बताए । उनले भने, “मुलुकमा पेसा, व्यवसाय र रोजगारीका अवसरहरू प्राप्त हुन सकेका छैनन् । यसका प्रत्याभूतिहरू सरकारी दस्ताबेजमा मात्रै सीमित रहेका छन् ।”
निजी क्षेत्रले लगानीका लागि खोजिरहेको सुरक्षा र सुनिश्चिताको अभाव रहेको सङ्केत गर्दै उनले सरकारका प्रतिबद्धताहरू कार्यान्वयन नहुँदा उद्यमी व्यवसायीहरूले समस्या भोग्नुपरेको धारणा राखे ।
