काठमाडौँ, १३ पौष । कलाकार तथा चलचित्रकर्मीको फोटो र नाम दुरुपयोग गरेर अनलाइन ठगीका घटना हुन थालेपछि चलचित्र विकास बोर्डले सजग हुन आग्रह गरेको छ ।
शनिबार एक विज्ञप्ति जारी गर्दै बोर्डले चलचित्रकर्मीलाई आफ्ना सामाजिक सञ्जालका खातामा बलियो पासवर्ड र ‘टू फ्याक्टर अथेन्टिकेसन’ अनिवार्यरुपमा प्रयोग गर्न सुझाएको छ ।
कसैले कलाकार वा चलचित्रकर्मीको नाममा पैसा मागेमा, वास्तविक व्यक्ति हो भनी पुष्टि नगरी कुनै पनि रकम नपठाउन समेत भनेको छ ।
पछिल्लो समय फेसबुक, म्यासेन्जर, इन्स्टाग्राम, ह्वाट्स एप लगायतका सामाजिक सञ्जालमा कलाकार तथा चलचित्रकर्मीको तस्वीर प्रयोग गरि नक्कली आइडी बनाउने, वास्तविक आइडी ह्याक गर्ने, साथीभाइ र शुभचिन्तकसँग पैसा माग्ने ठगीका घटना बढिरहेको तर्फ बोर्डले सचेत समेत गराएको छ ।
चीनको सुपरफास्ट रेलको रेकर्ड- २ सेकेन्डमै ७०० किमि प्रतिघण्टाको गति
एजेन्सी, १३ पौष । चीनले तीव्र गतिको यातायात क्षेत्रमा अर्को ठूलो फड्को मारेको छ । चीनको एक सुपरफास्ट चुम्बकीय लेभिटेसन (म्याग्लेभ) रेलले गुडेको दुई सेकेन्डमै ७०० किलोमिटर प्रतिघण्टाको गति पक्रेर नयाँ विश्व रेकर्ड कायम गरेको छ । यो हालसम्मको सबैभन्दा छिटो सुपरकन्डक्टिङ इलेक्ट्रिक म्याग्लेभ रेल मानिएको छ ।
४०० मिटर लामो ट्रयाकमा दौडियो रेल
यो परीक्षण चीनको राष्ट्रिय रक्षा प्रविधि विश्वविद्यालयका वैज्ञानिकहरूले गरेका थिए । यस परीक्षणका क्रममा करिब १००० किलोग्राम (एक टन) तौल भएको रेललाई ४०० मिटर लामो ट्रयाकमा दौडाइएको थियो । तर, यति छिटो गति छोएपछि पनि रेललाई पूर्ण रूपमा सुरक्षित तरिकाले रोक्न सफल भए जुन आश्चर्यजनक कुरा थियो ।
हावामा तैरिन्छ रेल
यो म्याग्लेभ रेल रेललाइनलाई स्पर्श नै गर्दैन । यसमा जडान गरिएका सुपरकन्डक्टिङ चुम्बकहरूले रेललाई माथि उठाएर हावामा तैराउँछन् र अगाडि धकेल्छन् । चक्र र रेललाइनबीच कुनै घर्षण नहुने भएकाले रेल अत्यन्त छिटो गतिमा दौडन सक्छ ।
परीक्षणको भिडियो पनि सार्वजनिक भएको छ, जसमा रेल बिजुली चम्केझैँ एकैछिनमा आँखाबाट ओझेल पर्छ । पछाडि केवल हल्का धमिलो रेखा बाँकी रहन्छ, जस्तो कुनै विज्ञान कथा फिल्मको दृश्य हो ।
रकेट लन्चसमेतको शक्ति
वैज्ञानिकहरूका अनुसार, यो प्रविधिबाट उत्पन्न हुने छिटो गति र शक्तिको उपयोग रकेट लन्चका लागि पनि गर्न सकिन्छ ।
भविष्यमा यसै प्रविधिबाट शहरहरूबीचको यात्रा मिनेटहरूमा पूरा हुन सक्छ । यो प्रविधिले हाइपरलुपजस्ता भविष्यका यात्रा प्रणालीहरूको बाटो पनि खोल्छ, जहाँ रेलहरू भ्याक्यूम ट्युबमा अत्यन्त छिटो गतिमा चल्नेछन् ।
