एजेन्सी, ९ पौष । लिबियाका सेना प्रमुख जनरल मोहम्मद अली अहमद अल–हद्दादको टर्कीमा भएको विमान दुर्घटनामा मृत्यु भएको छ ।
टर्कीको राजधानी अंकाराबाट लिबियाको त्रिपोलीतर्फ जाँदै गरेको फाल्कन-५० विमान मंगलबार साँझ स्थानीय समय अनुसार ८ः ५२ उडान भरेको थियो । करिब ४२ मिनेटपछि जहाज सम्पर्कविहीन भएको थियो । विमानले आपत्कालीन अवतरणको अनुमति मागेको केही समयपछि दुर्घटना भएको टर्कीका गृहमन्त्री अली येर्लिकायाले बताएका छन् ।
दुर्घटनामा जनरल हद्दादसहित विमानमा सवार अन्य चार जनाको पनि मृत्यु भएको छ । विमानको भग्नावशेष अंकाराको दक्षिण–पश्चिम क्षेत्र हायमाना जिल्लास्थित केसिक्काभाक गाउँ नजिक फेला परेको छ ।
लिबियाका प्रधानमन्त्री अब्दुल हमिद द्बेइबेहले जनरल हद्दादको मृत्यु राष्ट्रका लागि ठूलो क्षति भएको बताएका छन् । उनले देशप्रति निष्ठा र समर्पणका साथ सेवा गर्ने व्यक्तिहरू गुमाएको उल्लेख गरेका छन् ।
