काठमाडौँ, १६ मंसिर । नेपाल प्रिमियर लिग (एनपीएल) क्रिकेटमा जनकपुर बोल्ट्सले चितवन राइनोजलाई ६ विकेटले पराजित गरेको छ ।
चितवनले दिएको एक सय ७७ रनको लक्ष्य जनकपुरले १७ ओभर ३ बलमा ४ विकेट गुमाएर भेटायो । जनकपुरका अनिल शाह र माझ सदाकतले अर्धशतकीय पारी खेले । सदाकतले ६३ र शाहले ६१ रन जोडे ।
चितवनका सोहिल तन्विर, कमलसिह ऐरी र अमरसिंह रौटेलाले एक–एक विकेट लिए । त्यसअघि त्रिवि क्रिकेट रङ्गशाला, कीर्तिपुरमा टस जितेर पहिला ब्याटिङ गरेको चितवनले निर्धारित २० ओभरमा ४ विकेट गुमाएर एक सय ७६ रन बनाएको थियो । चितवनका डेविड मलान र अर्जुन साउदले अर्धशतकीय पारी खेले ।
मलानले ५४ बलमा सर्वाधिक ८० रन र साउदले ३९ बलमा ५२ रन जोडे । एनपीएलको पहिलो संस्करण विजेता जनकपुरको दोस्रो संस्करणमा यो पहिलो जीत हो । पाँच खेलमध्ये पहिलो जीत हात पारेर तालिकाको सातौं नम्बरमा रहेको जनकपुरको ‘प्लेअफ’मा पुग्ने गणितिय सम्भावना रहेको छ ।
