एजेन्सी, ११ मंसिर । पाकिस्तानमा लगातार ‘आतंकवादी’ हमला भइरहेको छ । आक्रमणमा ठूलो संख्यामा सुरक्षाकर्मी र नागरिकको मृत्यु भएको छ ।
पाकिस्तानको खैबर पख्तुनख्वा प्रान्तमा बुधबार एक जाँचचौकीमा ‘आतंकवादी’ले भीषण हमला गरेका छन् । उक्त आक्रमणमा तीन सुरक्षाकर्मीको मृत्यु पुष्टि भएको छ ।
यो हमला पाकिस्तानको खैबर पख्तुनख्वाको हंगु जिल्लास्थित काजी तालाब प्रहरी जाँचचौकीमा भएको जनाइएको छ ।
‘आतंकवादी’ले नजिकैको पहाडबाट जाँचचौकीमा तैनाथ सुरक्षाकर्मीमाथि गोलाबारी गरेका थिए । प्रहरीले तत्कालै जवाफी कारबाही गरेको थियो । त्यसपछि भीषण गोलाबारी सुरु भएको थियो ।
आक्रमणकारीको खोजीका निम्ति सम्बन्धित क्षेत्रमा थप प्रहरी बल तैनाथ गरिएको छ । त्यहाँका मुख्यमन्त्री सोहेल अफरीदीले हमलाको कडा निन्दा गर्दै विलम्ब नगरी घटनास्थलमा थप सुरक्षा बल पठाउने आदेश दिएका छन् ।
