एजेन्सी, ११ मंसिर । हङकङमा बुधबार राति अपार्टमेन्ट ब्लक्समा भएको आगलागीमा परेर ४४ जनाको मृत्यु भएको छ ।
अधिकारीहरूले पत्रकार सम्मेलनमा यो जानकारी दिएका हुन् । ४० जनाको घटनास्थलमा र चार जनाको अस्पतालमा मृत्यु भएको बताइएको छ ।
अन्य ४५ जनाको अवस्था निकै गम्भीर रहेको छ । अझै पनि २७९ जना बेपत्ता छन् । अग्नि नियन्त्रकहरूले आठमध्ये चार वटा भवनको आगो निभाउन सकेका छन् । आगलागी पूरै नियन्त्रण गर्न पूरै दिन लाग्ने बताइएको छ ।
अपार्टमेन्ट ब्लक्समा आगलागीपछि निर्माण कम्पनीका कार्यकारीहरूलाई पक्राउ गरिएको छ । कम्पनीका दुई निर्देशक र परामर्शदातालाई प्रहरीले घोर लापरबाहीको आरोपमा समातेको हो ।
आगलागी सुरु हुँदा अपार्टमेन्ट ब्लक्समा व्यापक मर्मत सम्भारको काम चलिरहेको थियो । आगलागी भएको भवनहरू नजिकैका १३ वटा विद्यालय बिहीबार बन्द गरिएको छ ।
