काठमाडौँ, ९ मंसिर । दोस्रो संस्करणको नेपाल प्रिमियर लिग (एनपीएल) क्रिकेटमा काठमाडौँ गोर्खाजले लुम्बिनी लायन्सलाई २२ रनले हराएको छ । काठमाडौँले दिएको १ सय ५८ रनको लक्ष्य पछ्याएको लुम्बिनी १९ ओभर १ बलमा १ सय ३५ रनमा अलआउट भयो ।
लुम्बिनीका शेर मल्लले २७ र दीलिप नाथले २५ रन बनाए । काठमाडौँका मिलिन्द कुमार र गेर्हार्ड इरास्मसले समान २ विकेट लिए ।
त्यसअघि कीर्तिपुरको त्रिवि क्रिकेट मैदानमा टस हारेर ब्याटिङ गरेको काठमाडौँले २० ओभरमा ८ विकेट गुमाएर १ सय ५७ रन बनायो । काठमाडौँका कप्तान करण केसीले ११ बलमा नटआउट ३४ रन बनाए । लुम्बिनीका रुबेन ट्रम्पेलम्यान, शेर मल्ल, गुलबदिन नइब र कप्तान रोहित पौडेलले समान २ विकेट लिए । यो जीतसँगै काठमाडौँले ४ खेलमा ४ अङ्क जोड्दै तेश्रो स्थानमा छ भने लुम्बिनी ३ खेलमा २ अङ्कसहित चौथो स्थानमा छ ।
दोस्रो संस्करणको एनपीएल क्रिकेटमा सुदूरपश्चिम, पोखरा, विराटनगर, काठमाडौँ, लुम्बिनी, चितवन, जनकपुर र कर्णाली गरी ८ वटा टोली सहभागी छन् । गएको मङ्सिर १ गतेदेखि शुरू भएको प्रतियोगिता यही २७ गतेसम्म चल्नेछ ।
