काठमाडौँ, ५ मंसिर । दोस्रो संस्करणको नेपाल प्रिमियर लिग (एनपीएल) क्रिकेटमा सुदूरपश्चिम रोयल्स लगातार दोश्रो खेलमा विजयी भएको छ । आज भएको खेलमा सुदूरपश्चिमले पोखरा एभेनजर्सलाई १८ रनले पराजित गरेको छ ।
सुदूरपश्चिमले दिएको १ सय ९४ रनको लक्ष्य पछ्याएको पोखराले २० ओभरमा ८ विकेट गुमाएर १ सय ७५ रन मात्रै बनाउन सक्यो । पोखराका कप्तान कुशल भुर्तेलले ५३, जिम्मी निशमले ४७ र डेन डउथवेटले ३७ रन बनाए । सुदूरपश्चिमका हर्मित सिंहले २, दीपेन्द्रसिह ऐरी, नरेन साउद, हेमन्त धामी, स्कट कुग्गेलिजन र अविनाश बोहराले समान १ विकेट लिए ।
त्यसअघि कीर्तिपुरको त्रिवि क्रिकेट मैदानमा टस हारेर ब्याटिङ गरेको सुदूरपश्चिमले २० ओभरमा ७ विकेट गुमाएर १ सय ९३ रन बनायो । सुदूरपश्चिमका जोश ब्राउनले ६८, विनोद भण्डारीले ४३, क्रिस लिनले ३१ रन बनाए । पोखराका जेम्स निशमले ३ विकेट लिए ।
प्रतियोगितामा दुवै टोलीको यो दोस्रो खेल हो । पोखरा पहिलो खेलमा विराटनगर किङ्ग्ससँग पराजित भएको थियो भने सुदूरपश्चिमले काठमान्डु गोर्खाजलाई हराउँदै विजयी शुरुआत गरेको थियो ।
