एजेन्सी, २२ कार्तिक । अमेरिकामा हवाई उडान रद्द वा ढिलाइ भएका छन् । न्यूयोर्क, लस एन्जलस, शिकागो, वाशिंगटन डीसीलगायत ४० विमानस्थलमा उडान कटौती हुँदा त्यसको असर यात्रुलाई परेको छ । विगत ३७ दिनदेखिको सटडाउन र तलब नपाएका कर्मचारीका कारण अमेरिकी विमानस्थलमा घरेलु उडान कटौतीको घोषणा गरिएको छ ।
हिजो मात्रै अमेरिकामा पाँच हजारभन्दा धेरै उडानहरू रद्द वा ढिलाइ भएका छन् । अमेरिकी इतिहासकै सबैभन्दा लामो बन्द निरन्तर रहँदा लाखौं सङ्घीय कर्मचारीले अहिले तलब बिना काम गरिरहेका छन् । जसमा एयर ट्राफिक नियन्त्रकहरू पनि समावेश रहेका बीबीसीले जनाएको छ ।
सङ्घीय कर्मचारीले तलब नपाउँदा ४० व्यस्त विमानस्थलमा उडान कटौतीको निर्णय गरिएको हो । अस्ति बिहीवार सङ्घीय उड्डयन प्रशासन (एफएए) ले शुक्रवार उडानमा ४ प्रतिशत कटौती, नोभेम्बर ११ तारिखमा ६ प्रतिशत कटौती, नोभेम्बर १३ मा १३ प्रतिशत र नोभेम्बर १४ मा १० प्रतिशत कटौती गर्ने योजना सार्वजनिक गरेको थियो । अन्तर्राष्ट्रिय उडान कटौती नगर्ने प्रशासनले जनाएको छ ।
