काठमाडौँ, ३० भदौ । राष्ट्रिय स्वतन्त्र पार्टी (रास्वपा)ले जेनजी प्रदर्शनमा घुसेर तोडफोडमा संलग्न दुई वडा संयोजकलाई निलम्बन गरेको छ ।
यही भदौ २३ र २४ गते पोखरामा ८० भन्दा बढी संरचना ध्वस्त भएका छन् । त्यसमा सरकारी संरचनादेखि नेताका व्यक्तिगत घर, व्यवसाय र व्यापारिक भवनसहित तरकारी मण्डी, वर्कशप समेत छन् ।
सोही कार्यमा संलग्न भएको भन्दै रास्वपाले पोखरा महानगरपालिका–१० का संयोजक चन्द्रबहादुर थापा र मादी गाउँपालिका–६ का संयोजक भोजराज पौडेललाई निलम्बन गरेको हो ।
वडा १० का थापा पोखरा महानगरपालिकामा कार्यालय र पोखराका मेयर धनराज आचार्यको घरमा आगजनीमा देखिएका थिए । “भदौ २३ र २४ गते जेनजीले आयोजना गरेको विरोध कार्यक्रममा पार्टीको आचारसंहिताभन्दा बाहिर रहेर विभिन्न अवान्छित क्रियाकलापमा संलग्न भएको विभिन्न सामाजिक सञ्जालमार्फत देखिन आएकोले तपाईंलाई अर्को निर्णय नहुन्जेलसम्मका लागि पार्टीका सबै जिम्मेवारीबाट निलम्बन गरिएको जानकारी गरिन्छ,” पार्टीको गण्डकी प्रदेश अनुशासन आयोगका प्रमुख योगेन्द्र केसीले जारी गरेको विज्ञप्तिमा जनाइएको छ ।
