काठमाडौँ, १८ भदौ । नेपाल र वेस्ट इन्डिजबीच हुने तीन खेलको टी–२० अन्तर्राष्ट्रिय शृङ्खलाको खेल तालिका सामान्य हेरफेर भएको छ ।
नेपाल क्रिकेट सङ्घ (क्यान) को आयोजनामा हुन लागेको शृङ्खला यूएईमा हुनेछ । सरजाह क्रिकेट रङ्गशालामा हुने शृङ्खला आउँदो असोजको ११, १३ र १४ गते हुने क्यानले जनाएको छ । यसअघि खेल असोज ११, १२ र १४ गते हुने तय भएको थियो । क्रिकेट इतिहासमै नेपालले पहिलोपल्ट टेस्ट राष्ट्रसँग टी–२० अन्तर्राष्ट्रिय शृङ्खला खेल्न लागेको हो ।
यो शृङ्खला नेपाल क्रिकेटको लागि ऐतिहासिक मात्र नभइ आउँदो टी–२० विश्वकप एशिया छनोटको तयारीमा समेत महत्त्वपूर्ण मानिएको छ । विश्वकप छनोट ओमानमा अक्टोबरमा हुँदैछ । यसअघि गएको वर्ष वेस्ट इन्डिजको ‘ए’ टोली नेपालमै आएर टी–२० शृङ्खला खेलेको थियो ।
