काठमाडौँ, १३ भदौ । भारतको आसाम क्रिकेट टोलीसँगको दोस्रो टी–२० अभ्यास खेलमा नेपालको ‘ए’ टोली ९६ रनले विजयी भएको छ ।
नेपालले दिएको १ सय ७४ रनको लक्ष्य पछ्याएको आसाम १५ ओभर २ बलमा ७७ रनमा अलआउट भयो । आसामका रुहिनन्दन पेगुले सबैभन्दा धेरै १७ रन बनाए । नेपालका युवराज खत्रीले ४, बसिर अहमदले ३ तथा कमलसिंह ऐरी, आकाश चन्द र विवेक यादवले १/१ विकेट लिए ।
यसअघि गुवाहिटीमा टस जितेर ब्याटिङ गरेको नेपालको ‘ए’ टोलीले २० ओभरमा ७ विकेट गुमाएर १ सय ७३ रन बनायो । नेपालका सन्दीप जोराले ३५, देव खनाल र पवन सर्राफले समान ३१, बसिर अहमदले २७, विवेक यादवले नटआउट २६ रन बनाए । आसामका आकाश सेनगुप्ताले ३ विकेट लिए ।
योसँगै ५ खेलको शृङ्खलामा नेपालको ‘ए’ टोली र आसामबीच १–१ को बराबरी भएको छ । हिजो भएको पहिलो खेलमा आसाम विजयी भएको थियो ।
