काठमाडौँ, १८ साउन । सामुदायिक विद्यालयमा खुला प्रतिस्पर्धाबाट शतप्रतिशत शिक्षक नियुक्ति गर्न १६ विद्यार्थी संगठनले माग गरेका छन् ।
प्रतिनिधिसभाको शिक्षा, स्वास्थ्य तथा सूचना प्रविधि समितिले ६० प्रतिशत आन्तरिक र ४० प्रतिशत खुलाबाट शिक्षक स्थायी गर्ने व्यवस्था विद्यालय शिक्षा विधेयकमा राख्न सहमति जुटाएकै बेला सत्तारूढ र प्रतिपक्षी दलनिकट विद्यार्थी संगठनले खुला प्रतिस्पर्धाबाट मात्र शिक्षक नियुक्ति गर्नुपर्ने माग अघि सारेका हुन् ।
नेविसंघ, अनेरास्ववियु, अखिल क्रान्तिकारीलगायत विद्यार्थी संगठनले शुक्रबार संयुक्त विज्ञप्ति जारी गर्दै विद्यार्थीमैत्री ऐन जारी गर्न सरकारको ध्यानाकर्षण गराएका छन् । विद्यालय शिक्षा विधेयकलाई विद्यार्थी संगठनसँग छलफल गरेर मात्र टुंगो लगाउनुपर्ने उनीहरूको माग छ । ‘विद्यालय शिक्षा विधेयक विद्यार्थीको प्रत्यक्ष सरोकार र चासोको विषय भएकाले संयुक्त विद्यार्थी संगठनको अनिवार्य सहभागितामा सर्वपक्षीय संवाद, वार्ता र छलफलमार्फत मात्र विधेयक अघि बढाउन सरकार, विषयगत संसदीय समिति र सम्बन्धित निकायसमक्ष संयुक्त विद्यार्थी संगठन जोडदार माग गर्छ,’ विज्ञप्तिमा भनिएको छ ।
विधेयकलाई अविलम्ब टुंगोमा पुर्याउन पनि पनि उनीहरूले सरकार र सरोकारवालालाई आग्रह गरेका छन् । सरकारले विद्यालय शिक्षा ऐन जारी गर्ने प्रतिबद्धता पटक–पटक जनाए पनि विद्यार्थीका मुद्दा र विधेयकप्रति उपेक्षा गरेको विद्यार्थी संगठनको आरोप छ । संविधानअनुसार प्रत्येक नागरिकले माध्यमिक तहसम्मको शिक्षा पूर्णतः निःशुल्क प्राप्त गर्न पाउनुपर्ने व्यवस्था अविलम्ब कार्यान्वयन गर्न संयुक्त विद्यार्थी संगठन सरकारसँग अपिल गरेका छन् ।
