एजेन्सी, १७ साउन । अमेरिकी राष्ट्रपति डोनाल्ड ट्रम्पले कमजोर रोजगारी वृद्धिको तथ्याङ्क सार्वजनिक भएपछि श्रम तथ्याङ्क आयोगकी प्रमुख एरिका म्याकएन्टारफरलाई तुरुन्त बर्खास्त गर्न निर्देशन दिएका छन् ।
ट्रम्पले सामाजिक सञ्जाल ‘ट्रुथ सोसल’मा लेख्दै, ‘मैले आफ्नो टोलीलाई बाइडेनले नियुक्त गरेका राजनीतिक अधिकारीलाई तुरुन्त हटाउन निर्देशन दिएको छु,’ भनेका छन् ।
शुक्रबार सार्वजनिक तथ्याङ्क अनुसार मे, जुन र जुलाई महिनामा रोजगारी वृद्धिको दर अघिल्ला अनुमानभन्दा धेरै कम भएको देखिएको छ, जुन अर्थतन्त्रका लागि चिन्ताजनक मानिएको छ ।
ट्रम्पले प्रमाण नदेखाई म्याकएन्टारफरमाथि रोजगारीका तथ्याङ्कलाई चुनावअघि हेरफेर गरेर उपराष्ट्रपति कमला ह्यारिसको जित सम्भावना बढाउने प्रयास गरेको आरोप पनि लगाएका छन् ।
