एजेन्सी, ३ साउन । युरोपेली संघ (ईयू)ले रुस–युक्रेन युद्धका कारण रूसमाथि नयाँ तथा व्यापक प्रतिबन्धहरूको प्याकेज पारित गरेको छ ।
यसले तेल निर्यातको मूल्यलाई सीमामा राख्दै मस्कोमाथि थप आर्थिक दबाब बढाउन खोजेको हो । रोयटर्सका अनुसार, यो रूसविरुद्धको १८औँ चरणको प्रतिबन्ध हो जुन सन् २०२२ मा आक्रमण भएपछि लागु गरिएको हो ।
ईयूको विदेश नीति प्रमुख काजा कालासले भनिन्, “ईयूले हालसम्मको सबैभन्दा कडा प्रतिबन्ध प्याकेजलाई स्वीकृत गरेको छ ।” युक्रेनका राष्ट्रपति भोलोदिमिर जेलेन्स्कीले प्रतिबन्धहरूको स्वीकृति आवश्यक र समयसापेक्ष रहेको भन्दै प्रशंसा गरेका छन् ।
यी नयाँ प्रतिबन्धहरू स्लोभाकियाले रूसी ग्यास आयात क्रमिक रूपमा हटाउने योजनाप्रति ब्रसेल्ससँग लामो समयको अवरोध हटाएपछि स्वीकृत भएका हुन् । रूसी ऊर्जा निर्भर स्लोभाकियाका नेता रोबर्ट फिकोले भविष्यको ग्यास मूल्यमा ब्रसेल्सबाट ग्यारेन्टी पाएपछि आफ्नो विरोध फिर्ता लिएका थिए ।
फ्रान्सका विदेशमन्त्री जीन–नोएल बारोटले नयाँ प्रतिबन्धहरूलाई अभूतपूर्व बताउँदै भने, “अमेरिकासँग मिलेर हामी (रूसी राष्ट्रपति) भ्लादिमिर पुटिनलाई युद्धविरामका लागि बाध्य गर्नेछौँ ।” जर्मन चान्सलर फ्रेडरिख मर्जले भने, “हामी रूसमाथि दबाब कायम राखिरहेको छौँ ।” तर, क्रेमलिनले यस प्रतिबन्ध प्याकेजको असर न्यून बनाउने प्रयास गरिरहेको जनाएको छ । उनीहरूले चेतावनी दिएका छन् कि यी प्रतिबन्धहरूले ईयूलाई नै उल्टो असर पुर्याउन सक्छ ।
प्रतिबन्ध प्याकेजको एक प्रमुख भाग विश्वभरका तेस्रो मुलुकहरूमा निर्यात हुने रूसी तेलको मूल्यलाई बजार मूल्यभन्दा लगभग १५ प्रतिशत कम राख्ने सहमति हो । हालको अनुमानित मूल्य प्रतिब्यारेल ४४७.६० युरो छ, जुन पुरानो ४६० मूल्यभन्दा घटेको हो । तर, यसको कार्यान्वयनमा केही ईयू सदस्यहरूले विशेष रूपमा अमेरिकालाई समेत सहमत गराउन नसकेको अवस्था देखिएको छ ।
