मुम्बई, ७ असार । मुम्बईको बान्द्रा ब्यान्डस्ट्यान्ड क्षेत्रमा रहेको शाहरुख खानको बंगला मन्नतको शुक्रबार निरीक्षण गरिएको छ ।
यो कारबाही वन विभाग र बीएमसीको टोलीले गरेको हो । टाइम्स अफ इन्डियाको रिपोर्ट अनुसार, शाहरुखले घर बनाउँदा तटीय नियमन क्षेत्रको नियम उल्लङ्घनको गुनासो आएको थियो । शाहरुख खानको यो बंगला समुन्द्र किनारमा छ ।
मन्नत एक सम्पदा सम्पत्ति हो । यसको पछाडि एउटा मुख्य बंगला र बहुमंजिला एनेक्स भवन छ । हाल, एनेक्स भवनमा दुई थप तलाहरू निर्माण भइरहेको छ ।
शाहरुख र उनको परिवार हाल नजिकैको कुनै अन्य ठाउँमा बसिरहेका छन् । टोलीले घटनास्थलमा रहेका कर्मचारीहरूलाई भेटेका थिए । कर्मचारीहरूले अधिकारीहरूलाई सबै स्वीकृतिहरू पहिले नै लिइएको र कागजातहरू पनि चाँडै पेस गरिने बताएका थिए ।
यसैबिच, शाहरुख खानकी म्यानेजर पूजा ददलानीले यसबारे कुनै गुनासो नभएको बताइन् । उनले निर्माण कार्य निर्धारित निर्देशिका अनुसार भइरहेको बताइन् । वन विभागका एक अधिकारीले उजुरी प्राप्त भएपछि टोलीले घटनास्थलको निरीक्षण गरेको जानकारी दिए । अब यसै आधारमा प्रतिवेदन तयार गरिनेछ। उता, बीएमसीका एक अधिकारीले विभागको अनुरोधमा आफूहरू त्यहाँ उपस्थित थिए ।
