काठमाडौँ, ६ असार । यहि जुन २२ देखि मलेसियामा सुरु हुने एसीसी यू-१६ इस्ट जोन कप खेल्न जाने नेपाली यु-१६ राष्ट्रिय क्रिकेट टोलीको बिदाइ गरिएको छ ।
आज नेपाल क्रिकेट संघ (क्यान) मुख्य कार्यालयमा आयोजित एक कार्यक्रमका बीच टोलीको बिदाइ गरिएको हो ।
बिदाइ कार्यक्रममा बोल्दै क्यानका कोषाध्यक्ष पदम बहादुर खड्काले नेपाली टोली राम्रो र सन्तुलित रहेको उल्लेख गर्दै नेपाली टोलीलाई जितका लागि शुभकामना व्यक्त गरे । त्यस्तै प्रशिक्षक दिपेन्द्र बहादुर चन्दले तयारी राम्रो भएको बताए । एक महिनादेखि जिल्ला स्तरिय हुँदै राष्ट्रिय तहकै प्रतियोगिता हुनाले धेरै सहयोग पुगेको उनको भनाइ थियो ।
कप्तान बिपिन प्रसाद शर्माले पनि तयारी धेरै राम्रो भएको बताउँदै टिम एकदम सन्तुलित रहेको उल्लेख गरे । यसअघि भएको एसीसी यू-१६ इस्ट जोन कपमा पनि नेपाल विजेता भएको थियो ।
क्यानले प्रतियोगिताका लागि बिपिन प्रसाद शर्माको कप्तानीमा १४ सदस्यीय टिम घोषणा गरेको छ । टिमको उपकप्तानको रूपमा सुर्यान्शु कोइराला छन् भने अन्य खेलाडीमा शिवांश बजगाईं, परिमर्जन यादव, रौनक श्रीवास्तव, अभय यादव, सचिन भट्ट, सुगम बुढाथोकी, सुयोग भट्टराई, सुशील बहादुर रावल, सुभम खनाल, प्रसिद्ध जैसी, जोय थापा र रोशन साही पनि सहभागी छन् ।
