एजेन्सी, २ असार । अमेरिकी राष्ट्रपति डोनाल्ड ट्रम्पको प्रशासनले थप ३६ देशका नागरिकलाई अमेरिका प्रवेशमा प्रतिबन्ध लगाउने तयारी गरिरहेको छ ।
अमेरिकालाई विदेशी आतङ्ककारी र अन्य राष्ट्रिय सुरक्षा खतराहरूबाट जोगाउन यही महिनाको शुरूदेखि राष्ट्रपति ट्रम्पले विभिन्न देशका नागरिकको प्रवेशमा प्रतिबन्ध लगाउन थाल्नुभएको हो । यसअघि उहाँले १२ देशका नागरिकहरूको प्रवेशमा प्रतिबन्ध लगाउने घोषणापत्रमा हस्ताक्षर गरेका थिए ।
अबको दुई महिनामा भुटानसहित ३६ देशलाई पूर्ण वा आंशिक रूपमा अमेरिका प्रवेश निलम्बनको लागि सिफारिश गर्ने तयारी भइरहेको अन्तर्राष्ट्रिय समाचार संस्था रोयटर्सले जनाएको छ ।
अमेरिकाले यात्रा प्रतिबन्ध लगाउने तयारी गरिरहेका देशमा एशियाका ४ देश भुटान, किर्गिजस्तान, सिरिया र कम्बोडिया समावेश छन् । त्यसैगरी, अफ्रिकाका २५ देशका नागरिकलाई पनि यात्रा प्रतिबन्ध लगाउने तयारी भइरहेको वाशिङ्टन पोस्टले उल्लेख गरेको छ ।
अफ्रिकी देशहरुमा अङ्गोला, बुर्किना फासो, बेनिन, काबो भर्दे, क्यामरुन, डेमोक्रेटिक रिपब्लिक अफ कङ्गो, जिबौटी, इथियोपिया, इजिप्ट, ग्याबोन, गाम्बिया, घाना, आइभोरी कोस्ट, लाइबेरिया, मलावी, मौरिटेनिया, नाइजर, नाइजेरिया, साओ टोमे एण्ड प्रिन्सिपे, सेनेगल, दक्षिण सुडान, तान्जानिया, युगाण्डा, जाम्बिया र जिम्बाब्वे छन् ।
त्यस्तै अमेरिकाले क्यारेबियन क्षेत्रका एन्टिगुवा एण्ड बारबुडा, डोमिनिका, सेन्ट किट्स एण्ड नेभिस, सेन्ट लुसियाका नागरिकमाथि पनि यात्रा प्रतिबन्धको तयारी गरिरहेको छ । ओसिनिया क्षेत्रका टोङ्गा, भानुआतु र तुभालुमा पनि यात्रा प्रतिबन्धको तयारी छ ।
