एजेन्सी, १३ जेठ । जापान सरकारले अमेरिकाले लगाएको आयात करको असरबाट जोगाउन साना तथा मध्यम व्यवसायहरूलाई १५ अर्ब ५० करोड डलर बराबरको राहत कार्यक्रम सार्वजनिक गरेको छ ।
अमेरिकाले जापानसहित धेरै देशका सामानहरूमा १० प्रतिशतको आधारभूत आयात कर तथा गाडी, फलाम र आल्मुनियममा अझै बढी दरको कर लगाएको छ जसको प्रत्यक्ष असर जापानी व्यवसायहरूमा परेको छ ।
सरकारले साना व्यवसायहरूलाई सहज ऋण, ऋण शर्तहरूमा सहुलियत तथा सरकारी ऋण संस्थामार्फत आर्थिक सहायता प्रदान गर्ने जनाएको अन्तर्राष्ट्रिय समाचार संस्था एएफपीले लेखेको छ ।
अमेरिकी राष्ट्रपति डोनाल्ड ट्रम्पले गएको मार्च महिनामा जापानका सामानहरूमा २४ प्रतिशत बराबरको ‘प्रतिशोधात्मक’ कर घोषणा गर्नुभएको थियो तर त्यो निर्णय जुलाई महिनाको शुरूसम्मका लागि रोकिएको छ । जापानले ती करहरू पूर्णरूपमा हटाउन आग्रह गरिरहेको छ । त्यसका लागि सरकारी प्रतिनिधि चाँडै चौथो चरणको वार्ताका लागि अमेरिका जाँदैछन् ।
