वासिङ्टन, ५ जेठ । अमेरिकी पूर्वराष्ट्रपति जो बाइडेनलाई प्रोस्टेट क्यान्सर भएको पत्ता लागेको छ जुन उनको हड्डीसम्म फैलिएको छ ।
उनको कार्यालयबाट आइतबार जारी विज्ञप्तिमार्फत यो जानकारी दिइएको हो । ८२ वर्षीय बाइडेनले गत हप्ता पिसाबमा देखिएको लक्षणका लागि डाक्टरलाई भेटेपछि शुक्रबार निदान गरिएको थियो । क्यान्सर रोगको यो अझ आक्रामक रूप हो, जसलाई ग्लीसन स्कोरमा १० मध्ये ९ ले चित्रण गर्छ। यसको अर्थ उनको रोगलाई ‘उच्च-ग्रेड’ को रूपमा वर्गीकृत गरिएको छ । क्यान्सर रिसर्च युकेका अनुसार क्यान्सर कोषहरू छिटो फैलिन सक्छन् ।
बाइडेन र उनको परिवारले उपचारका विकल्पहरूको समीक्षा गरिरहेको बताइएको छ । पूर्व राष्ट्रपतिको कार्यालयले क्यान्सर हर्मोन-संवेदनशील छ, जसको अर्थ यसलाई सम्भवतः व्यवस्थापन गर्न सकिन्छ ।
यो समाचार बाहिरिएपछि राष्ट्रपति डोनाल्ड ट्रम्पले आफ्नो सामाजिक सञ्जाल प्लेटफर्म ट्रुथ सोसलमा उनी र प्रथम महिला मेलानिया ट्रम्प यसको बारेमा सुनेर दुःखी रहेको बताएका छन् । उनले भने, ‘हामी जोको छिटो र सफल स्वास्थ्यलाभको कामना गर्दछौं ।’
बाइडेनको नेतृत्वमा काम गरेकी पूर्व उपराष्ट्रपति कमला ह्यारिसले एक्समा उनी र उनका पति डग एमहोफले बाइडेन परिवारलाई आफ्नो प्रार्थनामा राखिरहेको उल्लेख गरेकी छन्।
