एजेन्सी, ३ जेठ । उत्तर–पूर्वी युक्रेनमा यात्रुवाहक बसमा गरिएको रुसी ड्रोन आक्रमणमा नौ जनाको मृत्यु भएको स्थानीय अधिकारीहरूले बताएका छन् ।
सुमी क्षेत्रीय सैन्य प्रशासनले शनिबार बिहान बिलोपिलिया सहरमा अन्य चार जना घाइते भएको बताएको छ । रुस र युक्रेनले २०२२ पछि पहिलो पटक प्रत्यक्ष शान्ति वार्ता गरेको केही घण्टापछि यो आक्रमण भएको बताइएको छ । टेलिग्राममा एक पोस्टमा, सुमी क्षेत्रीय सैन्य प्रशासनले भन्यो, ‘बिलोपिल्या नजिकै शत्रुको ड्रोनले यात्रु बसलाई निशाना बनाउँदा नौ जनाको मृत्यु भएको छ भने चार जना घाइते भएका छन् ।’
बस क्षेत्रीय राजधानी सुमी तर्फ गइरहेको बताइएको छ। एक भिडियो सन्देशमा, सुमी क्षेत्रीय प्रमुख ओलेह ह्रिहोरोभले रुसी आक्रमणलाई ‘अमानवीय’ भनेर वर्णन गरे। प्रारम्भिक जानकारी उद्धृत गर्दै उनले शनिबार स्थानीय समय अनुसार बिहान ०६स्१७ बजे बसलाई रुसी ल्यान्सेट ड्रोनले निशाना बनाएको बताए ।
