काठमाडौँ, २ जेठ । महालेखाको ६२ औं प्रतिवेदनले विद्यालय तहमा विद्यार्थीको संख्या बढेको देखाएको हो ।
महालेखालाई आर्थिक वर्ष २०८०/०८१ मा शिक्षा तथा मानव स्रोत विकास केन्द्रले उपलब्ध गराएको विवरणअनुसार यो वर्ष पूर्व प्राथमिक, आधारभूत र माध्यमिक तहका ७७ हजार ९४४ विद्यालयमा ८५ लाख ८७ हजार २०६ जना विद्यार्थी छन् ।
जसमा सामुदायिक विद्यालयमा ५६ लाख ३५ हजार ३४२ जना, निजीमा २७ लाख ९४ हजार ४४५ जना र धार्मिक विद्यालयमा १ लाख ५७ हजार ४१८ जना विद्यार्थी छन् ।
अघिल्लो वर्ष ८० लाख ५७ हजार ९३० जना विद्यार्थी थिए । महालेखाको दुई आर्थिक वर्षको प्रतिवेदन हेर्दा ५ लाख २९ हजार २७६ जना विद्यार्थीको संख्या बढेको देखिन्छ ।
७७.६ प्रतिशत सामुदायिक विद्यालयमा ६५.६२ प्रतिशत विद्यार्थी छन् । संस्थागततर्फ विद्यालयको हिस्सा १९.९० प्रतिशत र विद्यार्थीको हिस्सा ३२.५४ प्रतिशत रहेको छ ।
अघिल्लो आर्थिक वर्षको भन्दा यो वर्ष निजी विद्यालयमा पढ्ने विद्यार्थीको संख्या बढेको छ । गत वर्ष ३१.८५ प्रतिशत विद्यार्थी निजीमा थिए । प्रतिवेदन अनुसार शिक्षकको संख्या ३ लाख २५ हजार ३१० शिक्षक रहेका छन् ।
