काठमाडौँ, २२ चैत । विपिन कार्की स्टारर ‘एन्टीहिरो एक्सन’ फिल्म ‘कर्मा’को ट्रेलर युट्युबमा सार्वजनिक भएको छ ।
३ मिनेट लामो ट्रेलरले कथावस्तु र चरित्र चित्रणबारे महत्वपूर्ण प्रकाश पार्छ । ‘नाका’मा एक्सन रोलमा देखिएको ७ वर्षपछि अभिनेता कार्की एक्सन फिल्ममा फर्किएका हुन् ।
फिल्मका शीर्ष कलाकार विपिनसहित उपासनासिंह ठकुरी, मुकुन भुसाल, दिब्यदेव पन्त लगायतलाई ट्रेलरमा देखाइएको छ । विपिनलाई एन्टीहिरो रुपमा प्रस्तुत गरिएको छ । आफूलाई व्यवस्थाले अपराधी बनाएको भन्दै विपिनको पात्र प्रणालीविरुद्ध आक्रोशित देखिन्छ ।
मुकुन लिड एन्टागोनिस्ट चरित्रमा छन् । उपासनालाई विपिनकी ‘लभ इन्ट्रेस्ट’को रुपमा देखाइएको छ । दिब्यदेव प्रहरी अफिसको चरित्रमा छन् । सरिता गिरी विपिनकी आमाको भूमिकामा छिन् । मुख्यतः फिल्मको कथा यी ४ पात्र वरपर घुम्छ । अपराध, तस्करी, प्रहरी र बदलाको नेक्सस वरपर कथा घुमेको छ ।
