एजेन्सी, १९ चैत । सिरियामा जातीय हिंसासम्बन्धी घटनाहरू पुनः वृद्धि हुँदै गएका छन् ।
सोमबार तटीय र केन्द्रीय क्षेत्रहरूमा भएका छुट्टाछुट्टै घटनाहरूमा १२ निर्दोष नागरिकको ज्यान गएको छ । सिरियन अब्जरभेटरी फर ह्युमन राइट्सका अनुसार मृतकमध्ये अधिकांश अलावाइट समुदायका रहेका छन् ।
सिरियाको सुरक्षा अवस्था अझै पनि जटिल छ । विशेष गरी इस्लामवादी नेतृत्वको बलहरूले करिब १४ वर्ष लामो गृहयुद्धपछि राष्ट्रपति बशर अल–असदको शासनलाई गत डिसेम्बरमा अन्त्य गरेपछि विभिन्न समुदायहरूबीच तनाव कायमै रहेको देखिन्छ ।
अनुगमन संस्थाका अनुसार तटीय टार्टस प्रान्तमा भएको एउटा आक्रमणमा स्थानीय अधिकारीसहित ६ जना नागरिकको ज्यान गएको छ । स्रोतहरूका अनुसार आक्रमणकारीहरू बानियास नजिकै रहेको नयाँ सरकार–समर्थित सैन्य अखडाबाट आएका थिए । प्रत्यक्षदर्शीहरूले आक्रमणकारीहरूले जातीय आधारमा धम्कीपूर्ण नारा लगाउँदै गोली प्रहार गरेको बताएका छन् ।
अलावाइट समुदायका धेरै नागरिकहरू बशर अल–असदको शासनकालमा भएको हिंसाका कारण प्रतिशोधको डर महसुस गरिरहेका छन् । यो महिनाको प्रारम्भमा पनि सिरियामा सबैभन्दा गम्भीर जातीय हिंसा देखिएको थियो, जसमा विशेष रूपमा तटीय क्षेत्रहरूमा ठूलो संख्यामा नागरिकहरू मारिएका थिए ।
