मस्को, २७ फागुन । रुसको राजधानी मस्कोमाथि मङ्गलवार बिहान ठुलो मात्रामा ड्रोन आक्रमण भएको छ ।
साउदी अरबमा अमेरिका र युक्रेनी प्रतिनिधिमन्डलहरूले शान्ति वार्ता थाल्न केही घण्टा अघि यो आक्रमण भएको हो ।
रुसी सुरक्षा बलले कम्तीमा ६९ वटा युक्रेनी ड्रोनहरू खसालेको मस्कोका मेयर सर्गेई सोब्यानिनले भनेका छन् । यस आक्रमणको क्रममा मस्को वरपरका रामेन्स्की र डोमोडेडोभो जिल्लाहरूमा मात्रै कम्तीमा ११ वटा ड्रोनहरू खसालिएका थिए ।
ड्रोनको आक्रमणमा परेर मस्कोमा एक जनाको मृत्यु भएको र तीन जना घाइते भएको रुसी अधिकारीहरूले भनेका छन् । यस समयमा, मस्कोतर्फ अघि बढिरहेका धेरै ड्रोनहरूलाई सुरक्षा बलले ध्वस्त पारेको उनले बताए ।
यो आक्रमण रुसले युक्रेनमाथि आक्रमण गरेयताको सबैभन्दा ठुलो भएको बताइएको छ । यस समयमा भ्नुकोभो, शेरेमेत्येभो र झुकोभस्की विमानस्थलहरूमा उडानहरू अस्थायी रूपमा रोकिएको थियो ।
