काठमाडौँ, १४ फागुन । नेपाली राष्ट्रिय महिला फुटबल टिमले बुधबार (आज) घरेलु मैदानमा जारी अन्तर्राष्ट्रिय महिला च्याम्पियनसिपको फाइनलमा बलियो टोली म्यानमारविरुद्ध प्रतिस्पर्धा गर्दै छ ।
खेल साँझ ६ बजेदेखि त्रिपुरेश्वरस्थित दशरथ रंगशालामा सुरु हुनेछ । बिदाको दिन परेकाले फाइनल हेर्न ठूलो संख्यामा दर्शकको उपस्थिति हुने अनुमान छ ।
नेपाली महिला टिमले पहिलो अन्तर्राष्ट्रिय खेलयता खेल्न लागेको यो १३औँ फाइनल हो । यसअघि नेपालले १२ फाइनल खेलिसकेको भए पनि हालसम्म कुनै पनि प्रतियोगिताको उपाधि भने जित्न सकेको छैन ।
पहिलो अन्तर्राष्ट्रिय खेलदेखि अन्तर्राष्ट्रिय महिला च्याम्पियनसिपसम्म नेपालले ३८ वर्षमा कुल १२ अन्तर्राष्ट्रिय प्रतियोगिताको फाइनल खेलिसक्यो । तर, सधैँ उपविजेता ।
