एजेन्सी, २७ माघ । इजरायल र हिजबुल्लाहबीच भएको युद्धविरामकाबीच पूर्वी लेबनानमा इजरायलले आक्रमण जारी राखेको छ । पछिल्लो समय इजरायलले गरेको हवाई आक्रमणमा परी ६ जनाको मृत्यु भएको छ भने दुई जना घाइते भएका छन् ।
लेबनानको राष्ट्रिय समाचार एजेन्सीका अनुसार शनिबार मात्रै पूर्वी लेबनानको जेन्नाटा सहर नजिकैको शारा क्षेत्रलाई लक्षित गरी इजरायली सेनाले आक्रमण गरेको हो ।
इजरायली सेनाले हिजबुल्लाहबाट युद्धविराम सम्झौताको उल्लंघन भएको बताउँदै आक्रमण गरिरहेको छ । सेनाले एक विज्ञप्ति जारी गर्दै ‘रणनीतिक हतियार उत्पादन र भण्डारण गर्ने स्थलभित्र’ हिजबुल्लाहका कार्यकर्ता भएको दाबी गरेको छ ।
गत नोभेम्बर २७ मा इजरायली सेना र हिजबुल्लाहबीच भएको द्वन्द्व अन्त्य गर्ने गरी भएको युद्धविराम सम्झौतालाई सङ्केत गर्दै विज्ञप्तिमा भनिएको छ, ‘ हतियार भण्डारण र उत्पादन स्थलभित्रका गतिविधिलाई इजरायल र लेबनानबीचको समझदारीको ठाडो उल्लङ्घन मानिएको छ ।’
