काठमाडौँ, १८ माघ । नेपाली कांग्रेस लोकतान्त्रिक खेलकुद सङ्घ महाधिवेशन निर्देशन समितिको आयोजनामा भएको पहिलो संस्करणको सभापति कप फुटबल प्रतियोगिताको उपाधि ‘ए’ डिभिजन टोली सङ्कटा क्लबले जितेको छ ।
त्रिपुरेश्वरको दशरथ रङ्गशालामा हिजो भएको फाइनल खेलमा आयोजक नेपाल लोकतान्त्रिक खेलकुद सङ्घ बाग्मती प्रदेशलाई पराजित गर्दै सङ्कटा क्लबले सभापति कप फुटबल प्रतियोगिताको उपाधि जितेको हो ।
निर्धारित ९० मिनेटको समयमा दुवै टोलीले गोलरहित बराबरी खेलेपछि खेल पेनाल्टीमा गएको थियो । पेनाल्टी सुटआउटमा पनि ३–३ गोलको बराबरी भएपछि अन्तिममा खेल सडन डेथमा पुग्यो । त्यसपछि सङ्कटाले बाग्मती प्रदेशलाई सडन डेथमा ४–३ गोलअन्तरले पराजित गर्दै उपाधि जितेको हो ।
प्रतियोगिताको विजेता टोली सङ्कटाले २६ लाख तथा उपविजेता बाग्मतीले १३ लाख पुरस्कार पाएका छन् । यही माघ १० गतेदेखि शुरू भएको कांग्रेस सभापति कप फुटबल प्रतियोगितामा आठ टिमको सहभागिता थियो ।
