एजेन्सी, १७ पौष । विश्व स्वास्थ्य सङ्गठन डब्लूएचओले चीनसँग विश्वभर फैलिएको कोभिड–१९ महामारीको उत्पत्तिसँग सम्बन्धित तथ्याङ्क मागेको छ ।
बीबीसीका अनुसार डब्लूएचओले पाँच वर्षअघि चीनको वुहान शहरबाट फैलिएको कोभिड–१९ महामारीबारेको सम्पूर्ण तथ्याङ्क उपलब्ध गराउन अनुरोध गरेको हो । कोभिड महामारीको पाँच वर्ष पूरा भएपछि नैतिक र वैज्ञानिक आवश्यकता भन्दै डब्लूएचओले तथ्याङ्क मागेको हो ।
डब्लूएचओले निकालेको विज्ञप्तिमा विभिन्न देशहरू बीचको पारदर्शीता, साझेदारी र सहयोगविना विश्वले भविष्यमा हुने महामारी र सङ्क्रमणलाई रोक्न र तयारी गर्न नसक्ने उल्लेख गरेको छ ।
धेरै वैज्ञानिकहरूले यो भाइरस जनावरहरूबाट मानिसमा फैलिएको बताएका छन् तर केही अझै पनि यो वुहानको प्रयोगशालाबाट उत्पन्न भएको शङ्का गरिरहेका छन् । चीनले भने कोभिडसम्बन्धी जानकारी केही नलुकाइ साझा गरेको दाबी गरेको छ ।
डब्लूएचओले रोगको उत्पत्तिको बारेमा बुझ्न थप तथ्याङ्क र पहुँचको आग्रह गरेपछि चीनको प्रतिक्रिया आएको हो ।
