काठमाडौँ, ६ पौष । नेपाल प्रिमियर लिग (एनपीएल) पहिलो संस्करणको विजेता टिम जनकपुर बोल्ट्सलाई नेपाली कांग्रेसका सभापति शेरबहादुर देउवा र नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले ट्रफी हस्तान्तरण गरेका छन् ।
आज सुदूरपश्चिम रोयल्सलाई हराउँदै च्याम्पियन बनेको जनकपुरलाई ट्रफी हस्तान्तरण गर्दा देउवा र प्रचण्डसँगै नेपाल क्रिकेट संघ (क्यान)का अध्यक्ष चतुरबहादुर चन्द पनि उपस्थित थिए ।
कीर्तिपुरस्थित त्रिवि क्रिकेट मैदानमा भएको फाइनलमा जनकपुरले सुदूरपश्चिमलाई पाँच विकेटले हराउँदै उपाधि जितेको हो । सुदूरपश्चिमले प्रस्तुत गरेको १८५ रनको लक्ष्य जनकपुरले १९.२ ओभरमा पाँच विकेट गुमाएर पूरा गरेको थियो । ट्रफी लिन जनकपुरका मार्की खेलाडी आसिफ शेख र नियमित कप्तान अनिल साह मञ्चमा पुगेका थिए ।
