काठमाडौँ, २५ मंसिर । अमेरिकाले ट्रम्प प्रशासनमा पनि एसिया र नेपालसम्बन्धी हालको नीतिलाई निरन्तरता दिने अमेरिकी सहायक विदेशमन्त्री डोनाल्ड लुले बताएका छन् ।
दुईदिने नेपाल भ्रमणमा आएका लुले सोमबार सञ्चारकर्मीसँगको अन्तर्क्रियामा अमेरिकाले नेपाल र एसिया क्षेत्रमा आफ्नो नीति परिवर्तन नगर्ने बताएका हुन् । नेपालका राजनीतिक दलहरू मिलेर ऊर्जा तथा सडक पूर्वाधार विकासमा ५० करोड अमेरिकी डलर अनुदानको मिलेनियम च्यालेन्ज कर्पोरेसन (एमसीसी) परियोजना कार्यान्वयन गर्नु राम्रो भएको उनले बताए । छिमेकी मुलुकसँग नेपालको राम्रो सम्बन्ध भएको अमेरिकाले हेर्न चाहेको पनि उनले बताए ।
लुले भने, ‘एमसीसी परियोजनाअन्तर्गत १० जिल्लामा १० हजार जनालाई रोजगारीको अवसर हुनेछ । यसमा नेपाली र अरू विदेशी कम्पनीले काम गरिरहेका छन् । जसले नेपाललाई एक वर्षमा विद्युत् निर्यात गरेर १० करोड डलरभन्दा बढी आम्दानी गराउनेछन् । नेपालमा सबै मिलेर एमसीसी परियोजना कार्यान्वयन गर्नु राम्रो हो ।’
दक्षिण र मध्यएसिया मामिला हेर्ने सहायक विदेशमन्त्री लु बाइडेन प्रशासनको अन्त्यतिर र ट्रम्प प्रशासन सुरु हुनुअघि नेपाल भ्रमणमा आएका हुन् । उनले आइतबार कांग्रेस सभापति शेरबहादुर देउवा र माओवादी अध्यक्ष पुष्पकमल दाहालसँग भेटवार्ता गरेका थिए । सोमबार उपप्रधानमन्त्री एवं अर्थमन्त्री विष्णुप्रसाद पौडेल र प्रधानमन्त्री केपी शर्मा ओलीका मुख्य सल्लाहकार विष्णु रिमालसँग भेटवार्ता गरे ।
