काठमाडौँ, १५ कार्तिक । उत्तर कोरियाले लामो दूरीको क्षेप्यास्त्र प्रहार गरेको आशङ्का गरिएको छ ।
दक्षिण कोरियाको सेनाका अनुसार उत्तरले अन्तरमहादेशीय ब्यालिष्टिक मिसाइल हानेको जस्तो देखिएको छ ।
दुई कोरियाली देशबिच सम्बन्ध बिग्रिएकै समयमा उक्त क्षेप्यास्त्र प्रक्षेपण भएको छ । क्षेप्यास्त्र स्थानीय समयअनुसार बिहीबार बिहान ७ः१० बजे प्रहार भएको भनिएको छ ।
अमेरिकामा नोभेम्बर ५ मा राष्ट्रपतिको निर्वाचनको समय अघि उत्तर कोरियाले लामो दूरीको क्षेप्यास्त्र प्रहार गर्ने तयारी गरिरहेको भनेर दक्षिण कोरियाले बुधबार नै चेतावनी दिएको थियो । उत्तर कोरियाले यस अघि गएको वर्ष डिसेम्बरमा लामो दूरीको क्षेप्यास्त्र हानेको थियो ।
बिहीबारको प्रहारको आफूले निगरानी गरिरहेको र यो स्थानीय समयअनुसार ८ः४० बजे समुद्रमा खसेको हुन सक्ने जापानले पनि बताएको छ । युक्रेनमा रुसी युद्धलाई सघाउन किम जोङ्ग उनले आफ्नो सेना पठाएको भन्दै अमेरिका र दक्षिण कोरियाले आरोप लगाइरहेकै समयमा उत्तर कोरियाले बिहीबार क्षेप्यास्त्र हानेको छ ।
