काठमाडौँ, २२ असोज । सांसद विनोद चौधरीले उखुको समर्थन मूल्य तोक्न सरकारसँग माग गरेका छन् ।
समयमै उखुको समर्थन मूल्य नतोक्दा किसान निराश बनेका भन्दै उनले सरकारको ध्यानाकर्षण गराएका हुन् ।
सांसद चौधरीले उपप्रधान एवं अर्थमन्त्री विष्णु पौडेल र कृषिमन्त्री रामनाथ अधिकारीलाई भेटेर किसानका समस्याका बारेमा ध्यानाकर्षण गराएका हुन् । सांसद चौधरीको निर्वाचन क्षेत्र नवलपरासी–१ उखु खेतीका निम्ति पकेट क्षेत्र मानिन्छ ।
गत वर्ष सरकारले तोकेको अनुदानापतको रकम किसानले अझै नपाएको र केही चिनी मिलले पनि किसानलाई हालसम्म भुक्तानी नदिएको उनले बताए । उनले बजारमा बढेको महँगीलाई ध्यान दिएर उखुको समर्थन मूल्य र अनुदान रकम पनि बढाउन माग गरे ।
उनले उखुको न्यूनतम मूल्य प्रतिक्विन्टल ७३५ र ढुवानीबापतको सरकारले प्रदान गर्ने अनुदान प्रतिक्विन्टल १०० गरी ८३५ रुपैयाँ कायम गर्न प्रस्ताव गरे ।
साथै, सांसद चौधरीले नवलपरासी केरा तथा उखुको पकेट एरिया भएको र यिनलाई बढी मलको आवश्यकता पर्ने उल्लेख गरे । हाल प्राप्त मलको कोटा अपुग भएको उनले बताए । उनले उक्त क्षेत्रका निम्ति मलको कोटा वृद्घि गर्न पनि सरकारसँग माग गरे ।
