एजेन्सी, १५ असोज । सन् २०२३ अक्टोबरमा गाजा युद्ध सुरु भएयता गाजा पट्टीका दुई–तिहाइ भवन क्षतिग्रस्त वा नष्ट भएको संयुक्त राष्ट्रसंघले सोमबार बताएको छ ।
राष्ट्रसंघीय उपग्रह केन्द्र (युएनओएसएटी–युनोस्याट) ले आफ्नो क्षति मूल्यांकनलाई अद्यावधिक गर्दै सेप्टेम्बर ३ र ६ मा संकलन गरिएका रिजोल्युसनका तस्बिरहरूले स्पष्ट रूपमा बिग्रँदो अवस्था देखाएको बताएको छ ।
‘यो विश्लेषणले गाजा पट्टीमा कूल संरचनाको दुई–तिहाइ भवन क्षतिग्रस्त भएको देखाउँछ’, युनोस्याटले भनेको छ, ‘गाजा पट्टीमा क्षतिग्रस्त भवनहरूको उक्त ६६ प्रतिशतले कूल एक लाख ६३ हजार सात सय ७८ संरचनालाई समेटेको छ ।’
जुलाईको प्रारम्भका तस्बिरहरूको आधारमा अन्तिम मूल्यांकनले प्यालेस्टिनी क्षेत्रका ६३ प्रतिशत संरचना क्षतिग्रस्त भएको निर्धारण गरेको थियो । सोमबारको अद्यावधिकले क्षतिमा अहिले ‘५२ हजार पाँच सय ६४ संरचना नष्ट भएको, १८ हजार नौ सय १३ गम्भीर रूपमा क्षतिग्रस्त भएको, ३५ हजार पाँच सय ९१ सम्भवतः क्षतिग्रस्त संरचना रहेको र ५६ हजार सात सय १० मध्यम रूपमा प्रभावित’ भएको बताएको छ ।
