काठमाडौँ, ९ असोज । विश्वकप क्रिकेट लिग–२ अन्तर्गत नेपाल र ओमानबीचको खेल वर्षाका कारण रद्द भएको छ ।
क्यानडाको किंग्स सिटी क्रिकेट मैदानमा नेपाली समयअनुसार गएराति पौने ९ बजे शुरु हुनुपर्ने खेल वर्षाका कारण हुन सकेन । खेल रद्द भएपछि दुवै टोलीले १–१ अङ्क बाडेका छन् ।
त्रिदेशीय श्रृङ्खलामा लगातारको हारका कारण दबाबमा रहेको नेपालले यो श्रृङ्खलाको आफ्नो अन्तिम खेल ओमानसँग खेल्न पाएन । पहिलो खेलमा क्यानडासँग १ सय ३ रनले हारेको नेपाल दोस्रो खेलमा ओमानसँग १ विकेटले र तेस्रो खेलमा क्यानडासँग ५ विकेटले पराजित भएको थियो ।
८ वटा टोली सहभागि लिग–२ को अङ्क तालिकामा नेपाल ८ खेलमा ३ अङ्कका साथ पुछारबाट दोस्रो स्थानमा यथावत् छ । ओमान ७ खेलमा ६ अङ्कका साथ छैटौँ स्थानमा छ । क्यानडा ११ खेलमा १४ अङ्कका साथ शीर्ष स्थानमा छ ।
एकदिवसीय श्रृङ्खलापछि यही असोज १२ देखि १७ गतेसम्म नेपाल, ओमान र क्यानडाबीच टी–२० श्रृङ्खला पनि हुँदैछ ।
