बेरुत (लेबनान), ५ असोज । लेबनानको बेरुत गढमा शुक्रबार गरिएको आक्रमणमा १४ जनाको मृत्यु भएको छ । दर्जनौँ घाइते भएका छन् । आक्रमणमा हिजबुल्लाहको एलिट युनिटका कमान्डरको समेत मृत्यु भएको इजरायलले जनाएको छ ।
सन् १९८३ मा बेरुतस्थित अमेरिकी दूतावासमा भएको विस्फोटमा संलग्न आरोपमा अमेरिकाले खोजिरहेका इब्राहिम अकीलले इरान समर्थित उग्रवादी समूहको नेतृत्व गरिरहेका थिए । हिज्बुल्लाहले शुक्रबार राति अकील इजरायली आक्रमणबाट मारिएको पुष्टि गर्दै एक महान् नेताका रूपमा प्रशंसा गरेको छ ।
एएफपीटीभी फुटेजले उद्धारकर्मी आक्रमणको केही समयपछि विभिन्न उपकरणका साथ खोजीकार्यमा तल्लीन रहेका देखाएको छ । गाजामा युद्ध सुरु भएदेखि हिज्बुल्लाहका वरिष्ठ कमान्डरको हत्या भएको यो दोस्रो घटना हो । गएको जुलाईमा गरिएको आक्रमणमा शीर्ष अपरेसन प्रमुख फुआद शुक्रको ज्यान गएको थियो ।
संयुक्त राष्ट्रसंघका महासचिव एन्टोनियो गुटेरेसका प्रवक्ता स्टेफन डुजारिकले यो घटनालगायत बढ्दो तनावका बारेमा चिन्ता व्यक्त गरेका छन् । सम्बन्धित सबै पक्षलाई अधिकतम संयमता अपनाउन उनले आह्वान गरेका छन् । इजरायली सेनाले अकीललाई लक्षित गरी आक्रमण गरेको जनाएको छ । उक्त आक्रमणमा अरू १० वरिष्ठ कमान्डरको समेत मृत्यु भएको छ ।
हिज्बुल्लाहको नजिकको एक स्रोतका अनुसार, अकील त्यस बेला कमान्डरसँगको बैठकमा थिए । लेबनानको स्वास्थ्य मन्त्रालयले आक्रमणमा कम्तीमा १४ को मृत्यु र ६६ जना घाइते भएका जनाएको छ । दूतावासमा विस्फोटको नाइकेका रूपमा वर्णन गर्दै अमेरिकाले अकीलका बारेमा जानकारी दिनेलाई सात मिलियन डलर पुरस्कारको प्रस्ताव गरेको थियो । एएफपी
