काठमाडौँ, २० साउन । शिक्षा, विज्ञान तथा प्रविधि मन्त्री विद्या भट्टराईले लोकप्रियतावादले मात्रै समाजको नेतृत्व गर्न नसकिने बताएकी छिन् ।
पोखरामा प्रेस चौतारीले आयोजना गरेको पत्रकार भेटघाट कार्यक्रममा उनले शिक्षकलाई अनावश्यक लाञ्छना लगाएर लोकप्रियता बटुले पनि समाजको नेतृत्व त्यसरी गर्न नसकिने बताएकी हुन् ।
उनले भनिन्, ‘शिक्षकहरूलाई अनावश्यक लाञ्छना लगाउने, झोले हुन् भन्ने, बेठिक हुन् भन्ने । तिनै शिक्षकहरूले विद्यालय धान्नुपर्ने छ । लोकप्रियतावादी विचारले मात्रै समाजलाई नेतृत्व गर्न सक्दैन । हामी लोकप्रिय पनि हुनुपर्छ । व्यवहारिक पनि हुनुपर्छ ।’
उनले शिक्षामा राजनीतिकरण नभई दलीयकरण रहेको बताइन् । ‘शिक्षामा राजनीतिकरण होइन दलीयकरण छ । तपाईंले यो कुरा लेख्नुभयो भने मैले गाली खानुपर्छ । तर मैले भन्न खोजेको चाहिँ नीतिले त्यहाँ नेतृत्व गरेको छैन । कानुनले, संविधानले नेतृत्व गरेको छैन,’ उनले भनिन्, ‘नीतिले विश्वविद्यालय र विद्यालयको नेतृत्व नगर्दासम्म हाम्रो राज्यसँग शिक्षा क्षेत्र जोडिँदैन । राज्य र शिक्षा जोडिनुपर्यो । नेता र शिक्षा जोडिने होइन, दल र शिक्षा जोडिने होइन । त्यसपछि मात्रै शिक्षामा परिवर्तन सम्भव छ ।’
