एजेन्सी, ५ साउन । उत्तरी चीनमा रहेको राजमार्गको पुल नदीमा खस्दा ११ जनाको मृत्यु भएको छ । ३० जनाभन्दा बढी बेपत्ता भएको सरकारी प्रसारणकर्ता सीसीटीभीले जनाएको छ ।
समाचार एजेन्सी सिन्ह्वाका अनुसार शुक्रबार राति करिब ८ः४० बजे वर्षासँगै आएको बाढीका कारण सानक्सी प्रान्तको साङ्लुओ नदीमा रहेको पुल भत्किएको हो ।
राजमार्गको पुल नदीमा खसेपछि लगभग २० वटा सवारी साधन र ३० जनाभन्दा बढी मानिस बेपत्ता भएको सीसीटीभीले बताएको छ ।
हालसम्म उद्धार गरिएका पाँचवटा गाडीभित्र ११ जनाको शव फेला परेको हो । सार्वजनिक तस्बिरहरूमा पुलको आंशिक भाग नदीमा डुबेको देखिएको छ ।
