काठमाडौँ, १६ असार । भारतीय क्रिकेट टिमका कप्तान रोहित शर्माले पनि अन्तर्राष्ट्रिय ट्वान्टी–२० क्रिकेटबाट सन्यासको घोषणा गरेका छन् ।
शनिबार आईसीसी ट्वान्टी–२० विश्वकपको उपाधि जितेपछि रोहितले सन्यासको घोषणा गरेका हुन् । यसअघि भारतीय टिमका ओपनर विराट कोहलीले पनि अन्तर्राष्ट्रिय ट्वान्टी–२० क्रिकेटबाट सन्यासको घोषणा गरेका थिए ।
“यो मेरो पनि अन्तिम ट्वान्टी–२० खेल थियो । यो संरचनालाई छोड्ने योभन्दा राम्रो समय अरु हुन सक्दैन । मैले यही संरचनाबाट भारतीय क्रिकेट टिममा सुरुआत गरेको थियो । यो मेरो चाहना थियो, म उपाधि जित्न चाहन्थे,” खेलपछि रोहितले भने ।
शनिबार भएको विश्वकप फाइनलमा दक्षिण अफ्रिकाविरुद्ध सात रनको जित निकाल्दै भारतले १७ वर्षपछि विश्वपको उपाधि जितेको थियो । भारतले यसअघि सन् २००७ मा पहिलोपटक ट्वान्टी–२० विश्वकपको उपाधि जितेको थियो ।
