काठमाडौँ, ११ असार । बिहीबारदेखि रिलीज हुने दक्षिण भारतीय सुपरस्टार प्रभासको फिल्म कल्कि २८९८ एडीले अग्रिम बुकिङबाट १७ करोड ४३ लाख भारु कमाएको छ ।
भर्खरै मात्रै फिल्मको अग्रिम बुकिङ खुलाइएको थियो । ठुलो पर्दामा आउनुअघि नै यो फिल्मले करोडौँ रुपैयाँ कमाउन थालिसकेको छ । कल्कि २८९८ एडीको अग्रिम बुकिङ जुन २३ देखि सुरु भएको थियो । पछिल्लो तथ्याङ्क अनुसार यो समाचार लेख्दासम्म फिल्मका ५ लाख ६२ हजार ९४५ टिकट बिक्री भइसकेका छन् । यी टिकटहरू देशभरका ९ हजार १२ शोका लागि बुक गरिएको हो । कमाइको कुरा गर्नु पर्दा यति टिकटको अग्रिम बुकिङबाट फिल्मले १७ करोड ४३ लाख भारु कमाएको छ ।
फिल्ममा प्रभासको साथमा अमिताभ बच्चन, दीपिका पादुकोण र कमल हसन लगायत कलाकारहरू भूमिका रहेको छ । यो फिल्म जुन २७ मा हलमा रिलिज हुँदै छ । चलचित्रलाई नाग अश्विनले निर्देशन गरेका हुन् ।
