काठमाडौँ, ७ असार । नेपाली कथानक चलचित्र ‘दान्भी’ र ‘आचार्य’ आजबाट प्रदर्शनमा आएका छन् ।
फ्राइडे रिलिजअन्तर्गत रुपेश तामाङको निर्देशन रहेको ‘दान्भी’ र प्रशान्त रासाइलीको निर्देशनमा बनेको ‘आचार्य’ प्रदर्शनमा आएका हुन् ।
फ्रेस रिलिज ‘दान्भी’ले उत्साहजनक शो पाउँदा रि–रिलिज ‘आचार्य’ले निकै न्यून हल पाएको छ । चलचित्र ‘दान्भी’मा अभिनेत्री पूजा शर्मा मुख्य भूमिकामा छिन् । उनले पहिलोपटक एक्सन भूमिका निर्वाह गरेकी छन् ।
चलचित्रमा पूजासँगै कुन्साङ बम्जन, किरण श्रेष्ठ, मोनालिसा खतिवडा, राजाराम पौडेल, कालु राणा, सीता तामाङलगायत कलाकारको पनि अभिनय छ ।
सत्यराज आचार्य मुख्य भूमिकामा रहेको चलचित्र यसअघि १३ वर्ष अगाडि रिलिज भएको थियो । ‘आचार्य’ गायक तथा संगीतकार भक्तराज आचार्यको बायोपिक मुभी हो । यो चलचित्रमा सत्यराजसँगै सुनील पोखरेल, सौगात मल्ल, विपीन कार्की, अरुणा कार्कीलगायत कलाकारको अभिनय छ ।
