काठमाडौँ, २८ चैत । फिल्म निर्माता जर्ज लुकासलाई ७७ औं कान्स फिल्म फेस्टिभलमा पाल्म डी’ओर अवार्डबाट सम्मानित गरिने भएको छ । मे २५ मा आयोजना हुने समापन समारोहमा यो अवार्ड प्रदान गरिने घोषणा कान्सले गरेको छ ।
अवार्डको घोषणापछि लुकासले प्रतिक्रिया दिंदै खुसी व्यक्त गरेका छन् । उनले विज्ञप्तिमा आफ्नो मनमा कान्स फिल्म फेस्टिभलको विशेष स्थान रहेको बताए । लुकासले भने, ‘मेरो पहिलो फिल्म ‘टीएचएक्स–११३८’ नयाँ निर्देशकका लागि तय गरिएको विधा डाइरेक्टर्स फोर्टनाइटमा प्रदर्शनका लागि छनोट हुँदा म छक्क र खुसी थिएँ । त्यसयता म लेखक, निर्देशक र निर्माताका रूपमा धेरै पटक कान्स फेस्टिभलको हिस्सा भएँ । यो सम्मान साँच्चै मेरो लागि धेरै महत्वपूर्ण छ ।’
