काठमाडौँ, ६ चैत । नेकपा एमालेका अध्यक्ष केपी शर्मा ओलीले उजुरी दर्ता भएकै आधारमा मन्त्री नहुने हो भने सबै पद खाली हुने बताएका छन् ।
आज धनगढीमा सञ्चारकर्मीले गृहमन्त्री रवि लामिछानेमाथि सहकारी ठगी प्रकरणमा उजुरी परेको र कांग्रेसले त्यही विषय संसदमा उठाएकोबारे सोधेको प्रश्नमा उनले भने, ‘उजुरी हालेकै विषयमा मन्त्री नहुने हो भने त नेपालमा मन्त्री, सांसद सबै खाली हुन्छ । उजुरी त एउटा लगेर हाल्दिए भैगो नि ‘।
उनले गम्भीर नै मुद्दा हुँदा, अपचलन देखिँदा, हिनामिना भएको ठहर भएमा त्यसलाई फरक ढङ्गबाट हेरिनुपर्ने बताए । ‘नेपाली कांग्रेसको तर्फबाट मन्त्री भएको सन्दर्भमा अस्ति कुरा उठेको थियो कि मुद्दा एकपछि अर्को छ, मुद्दा गम्भीर छन् तर झण्डा हालेर बयान दिइरहनुभएको छ, यस्तो अवस्थामा कमसेकम मन्त्रीको पद लिएर छानबिन,अनुसन्धान र न्यायमा प्रभावित गर्न नखोजेर किनारामा बस्नुस्’, अध्यक्ष ओलीले कांग्रेसका नेतामाथि प्रश्न उठ्न नसुनिएको बताउँदै भने । तर उनले एमाले नेतामाथि प्रश्न उठ्दा र बोलीमात्र चिप्लिदा पनि मन्त्रीबाट राजीनामा गर्न लगाएको स्मरण गरे ।
