काठमाडौँ, २१ फागुन । अख्तियार दुरुपयोग अनुसन्धान आयोगले जिल्ला प्राविधिक कार्यालय मुगुका तत्कालीन कार्यालय प्रमुख इन्जिनियर देवीप्रसाद पाण्डेसहित १० जनाविरुद्ध भ्रष्टाचार मुद्दा दायर गरेको छ ।
आज विशेष अदालत काठमाडौँमा उनीहरूले गैरकानुनी लाभ तथा हानी पुर्या्इ २६ लाख ८२ हजार १४ रुपैयाँ भ्रष्टाचार गरेको ठहर गर्दै मुद्दा दायर गरेको हो ।
अख्तियारले मुद्दा दायर गरेका अन्यमा जिल्ला प्राविधिक कार्यालय मुगुको सामुदायिक सिँचाइ आयोजना (सीआईपी)का इन्जिनियर महेशसिंह कठायत, सब–इन्जिनियर भीमबहादुर रोकाय, सीआईपीका प्राविधिक सर्जनबहादुर शाही, सोरु गाउँपालिका–९ का तत्कालीन वडाध्यक्ष परुनाथ योगी, साविक कालै गाविसका गाविस सचिव नव गिरी, तन्दवाडा सिँचाइ आयोजना उपभोक्ता समितिका अध्यक्ष लोगबहादुर शाही, सचिव बैदेवी शाही कोषाध्यक्ष रुपा शाही र सामाजिक परिचालन संयोजक प्रकाश बुढथापा छन् । दायर गरिएको मुद्दामा सबैसँग २६ लाख ८२ हजार १४ रुपैयाँ बिगो दाबी गरिएको छ ।
