काठमाडौँ, २५ पौष । विश्व टेनिसमा नयाँ नियम लागू गरिएको छ । उक्त नियम लागू भएपछि अब एटीपी र डब्लूटीए टुर प्रतियोगिताका कुनै पनि खेल राति ११ बजेपछि खेलाउन पाइने छैन । अब एटीपी र डब्लूटीए टुर प्रतियोगिताको समय तालिका निर्धारण गर्दा राति ११ बजेभन्दा अगाडि नै खेल सकिने गरी बनाउनु पर्नेछ ।
यसैगरी विश्व टेनिसको नेतृत्वदायी निकायले अब एक दिनमा एउटै कोर्टमा पाँचवटा भन्दा बढी खेल खेलाउन पनि रोक लगाएको छ । राति अबेरसम्म खेल खेलाउँदा खेलाडी र समर्थकबिच समस्या देखिएको भन्दै लामो समयदेखि विरोध हुँदै आएको थियो ।
राति अबेरसम्म खेल खेलाउँदा खेलाडी र समर्थकमा नकारात्मक असरहरु देखिएकाले यस्तो निर्णय लिइएको समाचारमा जनाइएको छ । सन् २०२२ को फेब्रुअरीमा मेक्सिकोको अकापुल्कोमा खेलिएको जर्मनीका एलेकजेन्डर जेरेभ र अमेरिकाका जेन्सन ब्रुक्सबिचको खेल अर्को दिन विहान ४ः५५ बजे सकिएको थियो ।
