काठमाडौँ, ११ मंसिर । नेपाली कांग्रेसका महामन्त्री गगन थापाले निर्वाचनमा उमेदवार बनाउने परिपाटी बदल्नुपर्ने बताएका छन् । आज नवलपुर जिल्ला सम्मेलनमा उनले उमेदवार जुन तहको निर्वाचन हो सोही क्षेत्रका सदस्यले छान्न पाउनुपर्ने बताए ।
माथिका नेताहरूले वडा सदस्यको टिकट दिने अवस्थाको अन्त्य गर्नुपर्ने उनको भनाइ छ । थापाले चुनावमा उमेदवारको खर्च पार्टीले बेहोर्नुपर्ने बताए । घरबार नभएकाले पनि चुनावमा लड्ने अवस्था निर्माण गरिने उनको भनाइ छ ।
“यति कुरा बदलौं । तपाईंले उमेदवार छानेपछि अब चुनावको खर्च सिंगो पार्टीले बेहोर्छ । उमेदवारले एक रुपैयाँ खर्च गर्नुपर्दैन । त्यसो गरेपछि अब हुनेखाने मात्रै होइन । घरबार नभएको मान्छे पनि कांग्रेसबाट उमेदवार बन्न सक्दछ,” उनी भन्छन्, “यो पार्टी सबैको पार्टी हो नि । कमजोर पार्टीको मान्छेले पनि उमेदवार बन्न पाउनुपर्यो नि ।”
