काठमाडौँ, १८ भदौ । एसिया कप–२०२३ मा भारतविरुद्ध नेपालका ओपनर आसिफ शेखले अर्धशतक बनाएका छन् ।
श्रीलंकाको क्यान्डीस्थित पालेकेले रंगशालामा जारी खेलमा टस हारेपछि ब्याटिङमा आएको नेपालका ओपनर आसिफले ८८ बलमा सात चौकासहित ५० रन पूरा गरेका हुन् । आसिफ दोस्रो ओभरको पहिलो बलमा क्याच आउट हुनबाट बचेका थिए ।
त्यसपछि दोस्रो ओभरको पहिलो बलमा मोहम्मद सिराजले गरेको बलमा आसिफ शेखको क्याच विराट कोहलीले छोडेका थिए । एकदिवसीय अन्तर्राष्ट्रिय क्रिकेटमा आसिफको यो १०औँ अर्धशतक हो ।
जारी खेलको २२ ओभर समाप्त हुँदा नेपालले चार विकेट गुमाएर १०२ रन बनाएको छ । नेपालले यसअघि कुशल भुर्तेललाई व्यक्तिगत ३८ र भीम सार्कीलाई सात रनमा, कप्तान रोहितकुमार पौडेललाई पाँच र कुशल मल्ललाई दुई रनमा गुमाएको थियो । हाल क्रिजमा आसिफसँगै क्रिजमा रहेको गुल्सन झा सात रनमा खेलिरहेका छन् ।
